Մենք պետք է առավելագույնս օգտագործենք մեր մարզի բնության բարիքները. Ալեքսանդր Գրիգորյան, գ. Գյուլագարակ, Լոռու մարզ:
Սոճու կոնի մուրաբայի և մեղրի արտադրություն, ապրանքանիշ - Դոկտոր մեղր
Ալեքսանդրի բիզնեսի գաղափարը ծնվել է սեփական տարածաշրջանի բնակլիմայական առավելություններն օգտագործելու անհրաժեշտությունից։ Լոռու մարզի եղանակային պայմանները հաճախ ազդում են բերքատվության վրա` գյուղացիներին կանգնեցնելով ծանր տնտեսական խնդիրների առաջ։ Ի լրումն, մարզում սահմանափակ են բարձրարժեք մրգային կուլտուրաների (օրինակ` ծիրան, դեղձ) աճեցման հնարավորությունները։ Գիտակցելով վերոնշյալ սահմանափակումները` Ալեքսանդրը հայացքը սևեռեց դեպի մարզի ամենաթանկարժեք ռեսուրսը` անտառների հարուստ բուսականությունը։ Ուսումնասիրելով տարածաշրջանի բուսականությունը` Ալեքսանդրը իր համար բացահայտեց բույսերի բազմաթիվ բուժիչ հատկանիշներ, որոնց պոտենցիալը բավարար կերպով չի օգտագործվում տարածաշրջանի բարեկեցության բարձրացման նպատակով։ Հասկանալով բացթողման անթույլատրելիությունը` Ալեքսանդրը ձեռնարկեց սեփական փոքր արտադրամասի հիմնումը Լոռու մարզի բարիքները մարդկանց հասանելի դարձնելու նպատակով։
Քայլ առ քայլ բարձրացնելով արտադրամասի տեխնիկական զինվածության մակարդակ` Ալեքսանդրը ներկայումս վերամշակում է տարբեր տեսակի բույսեր (ալոճ, սուսանբար, մասուր, մանուխ և այլն) և մրգեր (վայրի տանձ, խնձոր, սալոր): Արտադրվում են մի շարք ապրանքներ (սառը թեյեր, թուրմեր և այլ խմիչքներ), որոնցից առաջնայիններին են սոճու կոնից պատրաստված մուրաբան և մեղրը։
Սոճու կոներից պատրաստված մեղրն ու մուրաբան` իրենց բուժիչ հատկանիշների շնորհիվ վաճառվում են Հայաստանի խոշոր դեղատնային ցանցերում։ Սեփական արտադրանքի առաջմղման միջոցով Ալեքսանդրը նպաստում է նաև Հայաստանի բուսական աշխարհի օգտակար հատկանիշների վերաբերյալ մարդկանց տեղեկացվածության բարձրացմանը։